تامر حسني يناشد وزارة الصحة بحسم الجدل حول الغذاء في مصر.. ماذا قال ؟!

دعا الفنان تامر حسني الجهات الصحية في مصر إلى توضيح الحقائق المتعلقة بالتغذية، في ظل حالة الجدل الواسعة بين المواطنين حول الأطعمة المفيدة والضارة، مطالبًا بتقديم محتوى توعوي مبسط يعتمد على الأدلة العلمية.

وكتب تامر في منشور له عبر حسابه الرسمي على موقع التواصل الاجتماعي "فيسبوك": "في ظل الفتنة الغذائية اللي حاصلة في مصر وحديث كل الناس دلوقتي عن إيه المفيد لينا وإيه المضر هل ممكن أناشد وزارة الصحة المصرية وكبار الدكاترة المختصة وأصحاب المستشفيات بردود كافية فيها شرح مفصل عن إيه الأكل المفيد لينا وإيه اللي مش مفيد وياريت يكون شرح مفصل يفهمه الشخص العادي من غير أي مصطلحات طبية أجنبية؟".

وأضاف تامر حسني كاتبًا: "أولاً الخضار أمثال الخس والجرجير وورق العنب وكل الورقيات مفيدة ولا لأ وإزاي نطمن إنها مش مرشوشة مواد تمرض الناس".

وتابع: "ثانياً البيض والفراخ اللي في بلدنا ناكله إزاي وإزاي نميز ونطمن إنه مش محقون وإزاي نعرفه لو محقون".

استكمل حسني: "ثالثاً شرب المية بكثرة كما تعلمنا مفيد ولا لأ.. رابعاً الحليب مضر ولا كويس وإيه الصح اللي نشربه خامساً الأدوية لازم تتاخد ولا مش لازم ولا مش أي أدوية تتاخد!!!".

وفي السياق ذاته ناشد تامر حسني في منشوره الحكومة المصرية، كاتبًا: "أناشد وزارتنا المصرية تعملنا ڤيديوهات حد يطلع يكلمنا بالعامية ويرد بالتفصيل وبالأدلة العلمية على كل ده".

وتطرق تامر طالبًا: "وياريت يساعدني صديقي الأستاذ أيمن عباس بما إنه صاحب أكبر المستشفيات ياريت يطلعلنا دكاترة مختصة يعملوا ڤيديوهات ترد على كل اللي حاصل في مجتمعنا، وبناشد برضو الدكتور مجدي يعقوب يدينا من خبرته العظيمة والدكتور حسام موافي ويساعدونا الفترة دي كشعب ويريحونا من الجدل الفظيع ده".

واختتم الفنان تامر حسني منشوره كاتبًا: "لأن محدش بقى عارف ياكل إيه ومياكلش إيه وثوابت كتير اتغيرت بين يوم وليلة.. أرجوكوا متسيبوناش كده لا إحنا ولا ولادنا.. ومحتاجين حد يكلمنا بطريقة بسيطة عامية يشرح فيها بالتفصيل وبالأدلة إيه غلط وإيه صح عشان نحكم صح".

أخر أعمال تامر حسني السينمائية

يذكر أن أخر أعمال تامر حسني فيلم "ريستارت"، الذي طُرح في دور العرض خلال موسم عيد الأضحى 2025، وشاركه البطولة عدد من النجوم بينهم هنا الزاهد، باسم سمرة، محمد ثروت، عصام السقا، ميمي جمال، توانا الجوهري، وهو من تأليف أيمن بهجت قمر، وللمخرجة سارة وفيق.

قصة فيلم ريستارت

وتدور أحداث الفيلم حول شاب بسيط يعمل فني صيانة هواتف محمولة، تتغير حياته تمامًا بعد دخوله عالم السوشيال ميديا والشهرة السريعة عبر الترندات، ليجد نفسه في عالم مختلف مليء بالمواقف غير المتوقعة.