ليا عندهم فوق الـ 3 مليون.. طارق نجارة يشكو ليجي سي ومروان بابلو لنقابة الموسيقيين
كشف المنتج طارق نجارة تفاصيل خلافه مع ليجي سي ومروان بابلو، بعدما قدم شكوى ضدهما لنقابة المهن الموسيقية، بسبب عدم حصوله على مستحقاته المالية.
خلاف طارق نجارة مع ليجي سي ومروان بابلو
وقال طارق نجارة في تصريحات تلفزيونية: "حصلت محاولات كتير للحلول الودية وتم استنزافها بالكامل وتم تجاهل الموضوع لأن ليجي سي تحايل عليا واستولى على العقود اللي كانت بيني وبينه على أساس إننا هنأسس شركة مع بعض".
تفاصيل الخلاف بين المنتج طارق نجارة مع ليجي سي ومروان بابلو
وتابع المنتج طارق نجارة: "بدأنا نمشي في إجراءات تأسيسها أونلاين، وقالي أنا متوتر ووالدي قالي هات العقد.. وبمجرد ما خد العقد، تاني يوم اختفى.. ليا عنده مبالغ تتخطى 3 مليون جنيه من 2021».
واستكمل طارق نجارة: "ليجي سي ومروان بابلو كانوا مبطلين موسيقى وأنا أقنعتهم يرجعوا بعد تخلصي من العواقب اللي منعتهم من تأدية موهبتهم".
أزمة أرباح الأغاني مع الشركات
وأشار المنتج طارق نجارة إلى أن مدير أعمال ليجي سي، خالد أبو الليل، تواصل مع شركة منظمة وطلب نقل تحصيل الأرباح على حساباتهم الخاصة.
محاولات لحل خلاف المنتج طارق نجارة مع ليجي سي ومروان بابلو
واختتم المنتج طارق نجارة : "من وقتها الأرباح كلها بقت مبيجيليش منها حاجة وأنا أنتجت حاجة فليا أرباح فيها، فهو أخد المنتجات ومتردليش حقوقي فيها ومصدر الربح بتاعي مدخلش.. ليجي سي رفض يتكلم معايا ومجموعة من الأصدقاء تواصلوا مع مدير أعماله وقفل السكة في وشهم.. هو عنده قدرة إنه يحل الخلاف على جميع الأصعدة وأنا حاولت أتواصل أكتر من مرة ورفضوا، ومدير أعماله كان موظف عندي في الشركة ودي مصيبة تانية لأنه مكانش بيعرف يدير أعمال وأنا دربته".
أخر أعمال مروان بابلو
يذكر أن من أخر أعمال مروان بابلو السينمائية فيلم إيجي بست بطولة الفنان أحمد مالك وسلمى أبو ضيف يشارك في بطولته بجانبهم محمد عبده وحنان يوسف، والفيلم من تأليف أحمد حسني وإخراج مروان عبد المنعم، وتم طرحه في السينمات ودور العرض بموسم عيد الفطر 2026 .
