محمد شاهين عن واقعة مستشفى الشاطبي: "أنا مصدوم"
علق الفنان محمد شاهين على واقعة مستشفى الشاطبي، مستنكرا ماحدث وما قرأه من أفعال غير أخلاقية ومهينة يتعرض لها المرضى داخل المستشفى لا تمت للطب أو للمهنية بصلة.
محمد شاهين يطالب المسؤولين بالتحقيق في واقعة مستشفى الشاطبي
وكتب الفنان محمد شاهين عبر صفحته الرسمية على فيسبوك منشوار طالب فيها المسؤولين بالتحقيق في هذه الواقعة قائلا: بخصوص مستشفي الشطبي اللي أنا مصدوم حقيقي وأنا بقرأ، بصراحة احنا مش بنتكلم عن أخطاء فردية ولا تجاوزات بسيطة، إحنا بنتكلم عن انهيار كامل لمعنى الإنسانية قبل ما يكون انهيار للمهنة.
وأضاف الفنان محمد شاهين: المريض وهو داخل المستشفى بيبقى داخل وهو مكسور وخايف ومتألم آخر حاجة مستنيها إنه يتعرض لإهانة أو سخرية أو استغلال من الناس اللي المفروض تحميه، اللي بيشوف ست بتصرخ من الوجع ويضحك، أو يرفض علاج مصابة محتاجة مساعدة، أو يتعامل مع البشر بمنطق الأحكام والإهانات، يبقى نسي أصلا ليه دخل المهنة دي.
وتابع الفنان محمد شاهين: المخيف في الموضوع مش القصص نفسها بس المخيف إن فيه ناس واضح إنها اتعودت على المشاهد دي لدرجة إنها بقت شايفاها عادية، ودي أكبر مصيبة؛ لأن أول ما الإنسان يفقد إحساسه بوجع الناس، يبقى فقد أهم حاجة فيه،لو فيه ذرة احترام للمهنة دي لازم أي ادعاءات بالحجم ده تتحقق فيها جهات مستقلة بكل شفافية، ويتسمع لكل الأطراف، ويتحاسب أي شخص يثبت إنه أهان أو أضر أو استغل مريض تحت أي مسمى محدش فوق الحساب، ومحدش من حقه يكسر كرامة إنسان عشان لابس إيه أو جاي منين أو ظروفه إيه.
محمد شاهين: الطب عمره ما كان شهادة.. وكرامة المريض حق أصيل
وأكمل الفنان محمد شاهين: الطب عمره ما كان شهادة معلقة على الحيطة، الطب ضمير ورحمة ومسؤولية، ولما الضمير يغيب الشهادة لوحدها ملهاش أي قيمة، وأي مكان يوصل الناس إنها تخرج منه بصدمة نفسية بدل ما تخرج منه بعلاج، يبقى محتاج وقفة حقيقية ومراجعة حقيقية، لأن كرامة المريض مش منة من حد دي حق أصيل لا يقبل النقاش ولا التبرير
