شوفوا موضة جديدة.. ياسمين غيث تسترجع ذكريات "حلاوة الدنيا"
تحدثت الفنانة ياسمين غيث في منشور عبر فيسبوك عن المسلسلات التي تتناول مرض السرطان، وذلك بعد عرض مسلسل ورد على فل وياسمين.
كما تحدثت عن مسلسل حلاوة الدنيا الذي عُرض عام 2017، والذي شاركت فيه مستندة إلى تجربتها في محاربة السرطان، كما أنها استرجعت الكثير من الذكريات بمجرد عرض العمل عليها.
استعادة الذكريات
وعلقت ياسمين قائلة: “لما إتعرض عليا حلاوة الدنيا في مرحلة تجهيزه في ٢٠١٦ وقتها مشيش قال لي بنعمل مسلسل عن السرطان و عايزين نوصل منه رسالة تفاؤل للناس عن المرض ده زي ما انتي بتعملي على الsocial media دلوقتي و فيه دور عايزينك تعمليه! لما بدأت أقرا الورق، لقيت إنچي و سما كاتبين المسلسل بطريقة واقعية جداً و فعلاً المسلسل ماكانش من النوع الكأيب اللي يقفل الناس و يخوفهم من المرض ده، لأن فعلاً الواقع بتاع المرض ده إن فيه ناس مش بتخف منه و فيه ناس بتخف منه و بيبقوا كويسين و بيكملوا حياتهم عادي، و ده كان أول تجربه من نوعها في الوقت ده و أول مسلسل تقريباً يتكلم مباشرةً عن السرطان! و خلوا سليم يعيش علشان يدي أمل للناس، أمل حقيقي مش مزيف علشان فعلاً في مرضى سرطان في المخ بيعيشوا لو اتعالجوا صح، و رجعوا هبة من السفر برده و خلوها تعيش و تدي أمل للناس علشان برده ده بيحصل!”.
وأضافت: " المسلسل كان الوحيد من نوعه و ده اللي ميزه قوي وقتها، أكيد في أعمال اتكلمت عن موضوع السرطان قبل كدة، بس حلاوة الدنيا كان مختلف و الناس لسة فاكرينه و بيشوفوه و بيحبوه و مش "بيخافوا" يشوفوه!!!".
وتابعت: "نيجي بقى للكام السنة اللي فاتوا….للأسف أنا بقيت حاسة إنها طلعت موضة، أو كل ما المؤلف يتزنق في قصة، يخلي البطل أو البطلة عندهم سرطان، و كمية العبث و الحاجات الغير واقعية بقى اللي بتتقال و تتعمل عن المرض اللي معظمها مش صح ١٠٠٪, في حلاوة الدنيا إختاروني لسبب، كانوا عايزين الموضوع يكون بجد و حقيقي و واقعي من حد عاش التجربة بنفسه. لكن بجد اللي بيحصل دلوقتي ده تهريج، خلاص بقينا بين كل مسلسل و التاني ، بنخلي حد من الأبطال مريض سرطان، الموضوع بقى دمه تقيل جداً و بقى يخليني و أعتقد زيي ناس كتير نزهق، مانكملش المسلسل، بدأ الموضوع يقلب cliché جداً و مُمِل! فكفايه يا جماعة والنبي، حاولوا تبقوا creative أكتر من كدة بالله عليكوا و شوفوا قصص تانية بقى خلاص براڤوا كلكم مشيتوا على الموضة و عملتوها، كفاية بقى و شوفوا موضة جديدة لو سمحتم! شكرا ".
