هشام ماجد يكشف كواليس صادمة: "سقط في هندسة وأول مرتب ليا كان 1200 جنيه"
كشف الفنان هشام ماجد عن مجموعة من أبرز محطات حياته قبل الشهرة، متحدثًا عن فترة دراسته في كلية الهندسة وبداياته في سوق العمل، وبدايات علاقة مع الفنان شيكو.
وقال هشام ماجد خلال لقائه ببودكاست “مع كام لاحتياطي” مع البلوجر محمد عبدالعاطي، إنه لم يكن متفوقًا في الدراسة داخل كلية الهندسة، موضحًا: “أنا هندسة دي مفهمتش منها حاجة ولا مادة تقريبًا، كنت بحفظ وأدخل أحل في الامتحان، إلا الرياضة دي اللي كنت بفهمها”.
وأضاف أنه اكتشف لاحقًا أهمية الخبرة العملية، مؤكدًا أنه كان من الأفضل أن يعمل أولًا ثم يدرس، لكنه أوضح أن العمل لم يكن المجال المناسب له في النهاية.
هشام ماجد يروي كواليس أول لقاء جمعه بشيكو وبداية رحلتهما معًا
أما عن علاقته بـ شيكو، قال: “اتعرفت عليه في هندسة وعرفته على فهمي” واستكمل حديثه كاشفًا عن رسوبه في إحدى السنوات بكلية الهندسة، موضحًا: “أنا سقطت سنة في هندسة، وده كان من الأيام الصعبة في حياتي مكنتش متوقع خالص إني هعيد السنة، وفهمي وشريف نجيب هما اللي راحوا يشوفوا النتيجة وكانوا خايفين يقولولي وفضلت مكتئب شوية”.
واستكمل: “كنا بنتفادي إننا نشيل تلات مواد علشان منعدش السنة، وكنا كل سنة بنطلع بمواد لكن مكنتش متخيل إني هعيد السنة”.
وعن دراسته للهندسة، أوضح: “أنا هندسة دي مفهمتش ولا مادة فيها ولا فاهم فيها أي حاجة.. واحد داخل هندسة المفروض بيفكر أنا كنت بحفظ في كله إلا الرياضة، وفي مواد كتير معرفش إيه فايدتها.. واكتشفت إني كان لازم أشتغل الأول وبعدين أدرس لأني لما اشتغلت فهمت أكتر، بس في الآخر اتاكدت إن الشغلانة دي مش بتاعتي”.
موقف طريف لـ هشام ماجد في بداية عمله في الهندسة
وتابع حديثه مستعيدًا أول مكان عمل به، قائلًا: “ أول ما اتخرجنا وصحابي وشيكو اشتغلوا في شركة هي اللي بتبني فندق مشهور واللي ماسك المشروع كوريين وأصحابي كلموني أروح، وكل شغلتي الإنشاء وإني أشوف البانيوهات اللي فيها خدوش وأصورها أو أرسمها، وبعدها أكتب رقم الأوضة والبانيو، وفضلت شهرين مبعملش غير كده”.
وأضاف: “كان مديرنا اسمه مستر غان ومساعده اسمه شن وكان بيكرهني جدًا، وكان زي الكوريين بيعرف يلعب بوكس وبيطير وكان بيعمل كده مع السباكين اللي معانا، وجينا وقت شدينا في الكلام وزقني وضربته وطار بعيد وهو بيقوم براحة مكنتش عارف أعمل إيه، وكنا شغالين في الدور ال 18 ووقتها نزلتهم جري وفضلت أزعق في المكتب وهما وقتها كانوا بيخافوا من القلق، لانهم بيكونوا موجودين من غير أوراق ووقتها شيكو خوفهم وقالهم ده خاله مدير أمن، ومشيت ومرجعتش المكان تاني”..
أول أجر تقاضاه هشام ماجد
وتحدث عن أول تجربة عمل له عام 2003، حيث حصل على راتب 1200 جنيه شهريًا، وبدأ العمل في مجال الإنشاءات داخل أحد المشروعات الكبرى، إلى جانب أصدقائه ومنهم شيكو، حيث كانت طبيعة العمل تتعلق بتوثيق المواقع داخل المشروع ورسمها وتسجيل أرقام الغرف.
