حق الرد.. مدحت تيخا يوضح أزمته الأخيرة ويرد على عفاف مصطفى

حرص الفنان مدحت تيخا على كشف وتوضيح حقيقة أزمته مع المنتج عوض ماهر بشأن أزمة المستحقات المتأخرة، كما رد على هجوم الفنانة عفاف مصطفى.

وخلال مقطع فيديو قال تيخا:" أولًا الشيك ده بقاله 3 سنين، أنا صابر ومستني بقالي 3 سنين عشان أعرف آخد حقي ، من شهر اكتشفت إن الشيك مدته هتسقط بعد أيام، فكلمت الأستاذ وقولتله لو سمحت اديني فلوسي، فقال مفيش فلوس كالعادة طبعًا على مدار 3 سنين ، قولتله طب جددلي الشيك، اعمله بتاريخ جديد تاني عشان 2026 بدل 2023 عشان أستناك تلات سنين كمان، يبقى أنا كدة مستني ست سنين ، أظن أنا عداني العيب وأزح زي ما بيقولوا يعني"

وأضاف:"وأنا مكنتش مختار إن أنا أرفع قضية ، أولًا أنا أول مرة أرفع قضية في حياتي، أنا عمري ما بعادي حد ولا عمري حتى لو اتنصب عليا بقول فوضت أمري لله وربنا موجود ، ولكن أنا لجأت للقضاء عشان أضمن حقي وأضمن فلوسي اللي اشتغلت بيها، فأول ما أنا عملت كدة هو معجبوش، وفجأة أول ما عرف إن أنا رفعت قضية ، شتايم على الواتساب وأسوأ الألفاظ، عمري ما كنت أتخيل إن عشان بطالب بحقي ألاقي كدة".

وعن هجوم عفاف مصطفي قال:"واللي فوجئت بيه النهاردة وضايقني أوي على مواقع التواصل الاجتماعي، على فيسبوك تحديدًا، إن في زميلة بتهاجمني بأسوأ الصفات وأسوأ الكلام، وأنا لا تربطني بيها أي علاقة لا من قريب ولا من بعيد ، أنا مش عارف هي بتعمل فيا كدة ليه؟ يمكن عشان بطالب بحقي؟ وبعدين ده حكم محكمة، انتوا بتعترضوا على حكم المحكمة"

وتابع:"أنا لجأت للقانون لإننا في دولة قانون، والحمد لله المحكمة حكمتلي، فـ أنا ده حكم محكمة، أنتم بتعترضوا على حكم المحكمة ؟ أنا اخترت أسامح كل اللي شتمني وكل اللي أساء ليا، رغم إن أنا مش عارف، أنتم مفروض زملائي، مش عارف أنتوا بتهاجموني ليه؟ بدل ما تقفوا جنبي بتهاجموني مش عارف ليه ، ولكن أنا اخترت إن كل اللي شتمني وكل اللي خاض في عرضي احتسبته عند ربنا ومسامح حضرتك، ومسامح كل اللي شتمني عندك لوجه الله، خصوصًا لما لقيت صورة حضرتك وعرفت إن حضرتك في سن والدتي فـأنا مسامحك"

وتوجه في النهاية بالشكر لنقيب المهن التمثيلية دكتور أشرف زكي لإحتوائه الموقف.