مخدتش حقها.. مجدي الهواري يشيد بدور زوجته دنيا عبد المعبود في "القصة الكاملة"
أشاد المخرج والمنتج مجدي الهواري بدور زوجته الاستايلست دنيا عبد المعبود في مسلسل القصة الكاملة حكاية لعبة جهنم.
وكتب الهوراي عبر حسابه على موقع التواصل الاجتماعي فيسبوك:"كتبت كتير عن كل مبدعي «القصة الكاملة»، والحقيقة إن الجمهور بنفسه ادّى لكل واحد فيهم حقه من التقدير والثناء… ممثلين، مخرجين، تصوير، ديكور، موسيقى، مونتاج، إنتاج وهندسة صوتية… كل عنصر كان شريكًا حقيقيًا في نجاح العمل".
وتابع:"لكن النهارده أحب أتوقف عند دنيا عبد المعبود… أنا شايف انها مخدتش حقها بكفاية!.. مش علشان أتكلم عنها كزوجة ، لكن علشان أديها حقها كا واحدة من شركاء إبداع فاجأتني أنا شخصيًا في "القصة الكاملة".
وأضاف:"ساعات الموهبة بتكون في أقرب الناس ليك، وتكون أنت عارف إنها شاطرة وموهوبة ومتوفقة من ربنا في شغلها… لكن يفضل فيه جانب تاني جواها أنت نفسك لسه لم تكتشفه ولا هي . ولما الناس تشوفه وتصدقه وتنجّحه، تكتشف أنت حجم الموهبة اللي كانت قدامك".
وأشار:"دنيا قبل "القصة الكاملة" مصممة أزياء ناجحة ومبدعة، لكن في المشروع ده كانت بزيادة…ومجهودها ان شاء الله يوديها في حتة تانية.. من أول اختيارها للوك محمد فراج، واشتغالها عليه بلمسة إبداعية؛ فكرت، وذاكرت، وحضّرت، ونفّذت… هي اللي اختارت اللوك واتهجمت فيه والصراحة فراح بس هو اللي دعمها لكن حتى ده مش هو اللي أقصده".
وقال:"اللي أقصده إنها صنعت مهنة وتايتل يمكن لأول مرة يظهر بالشكل ده في مصر: Content Producer.. مش قصدي منتجة تتابع التنفيذ، لكن عين بتشوف المحتوى، وعقل بيفكر فيه، وذوق بيلتقط العنصر اللي ممكن يصنع الفارق".
واستكمل:"وده ظهر بوضوح لما كانت صاحبة الإلهام في اختيار سامح سند، وشاورت عليه… وكانت بالنسبة لي مفاجأة حقيقية في طريقة تفكيرها للمشروع.. ساعات الواحد بيكتشف في نفسه موهبة ماكانش يعرف إنها موجودة… وساعات اللي حواليه هما اللي بيكتشفوها فيه. موهبة يمكن ما تكونش هي الـCareer الأساسي، لكنها تكشف عن صفة وقدرة جديدة، كانت مستنية المشروع المناسب علشان تظهر".
واختتم:"شكرًا يا دنيا… على الموهبة، وعلى الإلهام، وعلى عينك اللي شافت حاجة ماحدش شافها، وعلى وجودك شريكة في الحلم قبل ما تكوني شريكة في النجاح.. كل الشكر والدعم والحب… والامتنان الأكبر لأنكِ فاجأتِ الجمهور، لكن الأجمل إنكِ فاجأتِني أنا كمان.. وأحيانًا أجمل نجاح في حياتنا… مش إن الناس تكتشف موهبتنا، لكن إننا نكتشف من جديد موهبة أقرب الناس لقلوبنا".
