رامي جمال عن ألبوم محسبتهاش: أنا بحب المزيكا والتوفيق من عند ربنا
حل الفنان رامي جمال ضيفًا على برنامج "أجمد 7" مع المذيعة جيهان عبدالله، على إذاعة "نجوم إف إم"، مساء الإثنين، احتفالًا بإطلاق ألبومه الجديد "محسبتهاش".
وأعرب الفنان رامي جمال خلال اللقاء عن سعادته بتفاعل الجمهور مع الألبوم، وقال: “كلما اقتربت من الناس أكثر، شعرت أن لي نصيبًا أكبر في قلوبهم، ويهمني دايمًا تقديم تجربة صادقة نابعة من قلبي، بألحان تلامس الناس ومزيكا جديدة”.
وأضاف رامي جمال: "أما التوفيق فمن عند ربنا، أنا بحب المزيكا، مش بشتغلها.. هي هوايتي اللي عمري ما هبطلها".
وعلى صعيد أخر رامي جمال تحدث عن واقع الموسيقى الحالي قائلًا: "إحنا في عصر فيه التراب ميوزك، والراب، والأندر جراوند، والبوب، والكلاسيك، والمهرجانات، وكل الألوان دي ناجحة وليها جمهور، وفي الألبوم الجديد بقدّم دويتو مع الفنان التونسي نوردو، صاحب صوت إسباني مميز جدًا، وكانت تجربة مختلفة وممتعة بالنسبالي".
وتابع رامي جمال: "كمان فيه دويتو مع الفنان حمزة نمرة، ولقينا تراك فيه كلام حابين نقوله إحنا الاتنين، وما ترددناش لحظة، المميز إن نوردو وحمزة ما حطوش أي شروط تتعلق بالبيزنس، كان هدفنا الأول والأخير نقدم أغنية تسعد الجمهور، علشان كده بنحب دايمًا نراهن على غير المتوقع".
وعن أغنية "محسبتهاش"، أوضح رامي جمال: "الأغنية بتحكي عن التغيير اللي بيحصل للشخص بعد صدمة من حد كان بيحبه، من وجهة نظري، العلاقات المفروض تكون راحة للطرفين، لكن لما نوصل لمرحلة الأذى، الرجوع بيكون صعب، لأن بتبقى فيه رواسب مش بتروح بسهولة".
وفي ختام الحوار، قال رامي جمال: "الحمد لله، الجمهور بيحب الأغاني اللي بقدمها على مدار مشواري، وده معناه إن اللي بنعمله واصل وقادر يلمس أذواق مختلفة، وسعيد جدًا إن أغانيي القديمة زي (أوعديني) و(صقف) لسه ليها مكان عند الجمهور وبيتطلب سماعها باستمرار".
