رشا سامي العدل: سامح عبد العزيز وجع قلبي في ذكرى وفاة بابا
أعربت رشا سامي العدل، عن حزنها برحيل المخرج سامح عبد العزيز، والذي رحل عن عالمنا صباح اليوم، بالتزامن مع ذكرى وفاة والدها الفنان سامي العدل.
وكشفت رشا سامي العدل، احد المواقف التي جمعتها بالراحل سامح عبد العزيز، مؤكده أنه كان دايمًا على تواصل معاها، ويدعمها وقت مرض والدها الفنان سامي العدل، فضلا عن عرضه عليه أن يشاركها في مشروعها من باب الدعم.
"ماسابنيش وقت تعب بابا"
نشرت رشا سامي العدل، صور للراحل سامح عبد العزيز، عبر حسابها الشخصي على فيسبوك، كاتبه: "وجعت قلبي وقهرتني علي الصبح أكتر ما هو موجوع في ذكرى وفاة بابا مشيت ورحلت عننا، أنا عمري ما طلعت الكلام ده، ولا قلته أو وريته لحد بس حقك عليا، دلوقتي أقول وربنا يشهد على كلامي إنك من أجدع الأصدقاء ومن أوفاهم، أنا منزلة موقفين من ضمن مواقف كتير معايا أنا شخصيا بس بعضهم شخصي بزيادة فأمتنع عن نشرهم.
“وأضافت رشا: ”طبعًا لما بابا تعب سامح كان رغم شغله وانشغاله في موسم رمضان متابع معايا لحظة بلحظة، تليفونات طبعًا ورسايل ماسنجر وهو مشغول، وطبعًا زيارات رغم إن ماكنش بيتسمح بزيارات قوي يعني، بس ده ما منعش إنه يجرب وييجي وماسابنيش طول فترة تعب بابا".
"كان عايز يشاركني في مطعم"
وتابعت رشا: “بعدها كان يحرص إنه يطمن عليا من حينٍ للتاني، ويسأل إذا كنت محتاجة حاجة أو ناقصني حاجة، لما فتحت مشروع صغير على قدي وقررت أعمل أكل وأبيعه، كان أول من أراد وبإصرار إنه يشاركني ونفتح مطعم في القاهرة، وكل فترة كان يتصل بيا يقوللي: هاه، يلا بقى، أرد عليه: لسه شوية على الخطوة دي يا موحا، وأنا نفسيًا مش قادرة أنزل القاهرة دلوقتي”.
وفي سايق متصل أوضحت رشا سامي العدل، كاتبه: "يسكت أسبوع أو اتنين، ويرجع ويتصل بيا: (يا بنتي فكري بقى، تعبتيني، أقول له: ما إحنا لسه متكلمين، يرد: ولسه برضه بتعندي، ويحاول يقنعني: طيب يا رشا، أنتِ بالمجهود وأنا برأس المال، أقول له: مش ده اللي معطلني، يسبني شوية ثم يتصل من جديد علشان يشجعني على الخطوة، وهكذا".
"كان صديقي من زمان"
وأضافت رشا سامي العدل: “صاحبي صديقي وأخويا الجدع، ماكنش حد عارف إن سامح أصلًا صديقي من زمان، بعيد عن بابا والعيلة والوسط الفني ومن قبلهم، وله مكانة خاصة في قلبي، لأن بابا كان بيحبه قوي وهو كمان كان بيعشقه، أديك روحت له يا موحة وسيبتوني هنا لوحدي، بس أنا مش هاسيبكم وهافضل فاكراكم وأدعيلكم، ووعد مش هانساك ولا هاقطع دعواتي ليك يا غالي”.
وأختتم رشا سامي العدل، كاتبه: "مع السلامة يا صديقي الجدع الطيب، الله يرحمك ويغفر لك ويسكنك الفردوس الأعلى من غير حساب ولا سابق عذاب.. وداعًا سامح عبد العزيز".
