أمينة تهاجم جمهور السوشيال ميديا بسبب فيديوهات العزاء: اتقوا الله فينا

خرجت الفنانة أمينة عن صمتها، ووجّهت رسالة حادة عبر حساباتها الرسمية، ردًا على التعليقات المسيئة التي لاحقتها بعد مشاركتها في عزاء الفنان الراحل أحمد عامر، خاصة بعد انتشار فيديوهات العزاء التي حملت  بحسب وصفها  عناوين "لا تمت للواقع بصلة". 

وقالت أمينة: "جمعة مباركة عليكم إخواتي وحبايبي وأصحابي، معلش استفزني كومنتات لاقيتها على الفيديوهات بتاعة عزاء أحمد عامر، الله يرحمه ويحسن إليه، الناس معذورة برضه، العناوين المكتوبة على الفيديوهات لا تمت للواقع بصلة، أنا روحت عزيت نقابة المهن الموسيقية، كل ده تمام، يطلع واحد وغيرو كتير مش فاهمين أي حاجة، بيهبدوا وخلاص."

وأضافت:"خلاص مش لاقيين حاجة تتهمونا بيها، تتهمونا إن إحنا بنشرب وبندخل المكيفات مصر، أنا هتكلم عن نفسي، أنا واحدة من الناس اللي مقدرش أشرب مية ساقعة ولا دخان من أي نوع. وحسبنا الله ونعم الوكيل اللي يقول ما ليس فينا."

وتابعت: "اللي يشرب يشرب، هو حر طالما مش بيأذيني. إنت كده اتهمت واحد متوفي، وغيرو فنانين كتير مالهمش في أي حاجة، اتقِ الله. واللي كاتب إني ما وقفتش في عزاء أخويا.. منك لله يا أخي! الحمد لله، صلتي بكل قرايبي زي الفل، ما بالك بأخويا! مش عايزة أشتمك عشان ما تستاهلش."

وأردفت: "الحمد لله لا عمري طلعت من توبى، ولا عشت الدور، ولا ليا مع حد خصومة. وغصب عني كتبت كده لأول مرة، الناس بقت مستفزة جدًا وقليلة أدب، إلا من رحم ربي. إنتو لا تعرفونا، ولا تعرفوا إحنا فينا إيه، وبنعاني من إيه."

واستكملت أمينة حديثها برسالة حاسمة: "حسدتونا وعنيكم جابتنا الأرض، قاعدين تحسبوهالنا! لو دققتوا في الكومنتات شوفوا كاتب إيه الراجل الرزل البايخ، وأراهن أي حد فيكو عنده موهبة كصوت أو كممثل وما يستغلهاش، مش ذنبنا إن إحنا فنانين بالفطرة والموهبة، وإنت قاعد تحسبهالنا؟ إنت ما تعرفش بندفع إيه قدام ده، منكم لله بجد."

وختمت رسالتها بقولها: "معظم الناس حاطة الفنانين دول في فريم إن إحنا تماثيل شمع، مش بنحس، ولا عندنا دم. اتقوا الله فينا، كفاية إنتو ما تعرفوش إحنا فينا إيه. اتقوا الله."