جوري بكر تنتقد شباب الساحل: "مش كل مكان ينفع فيه المايوه"
أعربت الفنانة جوري بكر عن استيائها من سلوكيات بعض الشباب في الساحل الشمالي، خاصة فيما يتعلق بالتعامل مع العاملين هناك، مشيرة إلى ظاهرة التحدث باللغة الإنجليزية مع العمال بشكل مبالغ فيه، ما يخلق حالة من التعقيد والتصنع، على حد وصفها.
"ليه بنعقدها على بعض؟ اتكلموا عربي"
من خلال مقطع فيديو نشرته عبر خاصية "الستوري" على حسابها الرسمي بـ"إنستجرام"، انتقدت جوري تصرف البعض بالتحدث الدائم باللغة الإنجليزية في الأماكن العامة بالساحل، قائلة: "إحنا ليه لما بننزل الساحل بنتكلم إنجليزي؟ سهلوها على بعض واتكلموا عربي علشان الناس تفهمكم، وأنا كنت زيكم قبل كده لحد ما صديقة قالتلي: لو عايزة توصلي للناس اتكلمي بلغتهم".
"العمال مش فاهمينكو.. ورحموهم شوية"
وتابعت جوري بكر حديثها: "ليه لما بتكلموا العمال بتعوجوا لسانكم عليهم؟ دول شباب محترم بيشتغل في الصيف علشان يوفر مصاريف جامعته أو يجوز نفسه، لما بتكلموهم إنجليزي هما مش فاهمين، وإحنا كمان أوقات مش بنفهم".
وأضافت جوري بكر: "أنا بحترم الناس اللي بتتعب وبتشقى علشان تحس بقيمة الجنيه، وبفرح لما ألاقي الناس البسيطة من الجارسونات والشيفات هما اللي بيحبوني بجد".
"مش علشان إحنا في الساحل نلبس المايوه في العيادة!"
جوري لم تكتفِ بانتقاد طريقة الكلام، لكنها انتقدت أيضاً بعض التصرفات غير اللائقة في أماكن غير مناسبة، قائلة: "ليه أدخل عيادة ألاقيكي لابسة مايوه؟! حضرتك البسيه على البحر مش في أي مكان. إحنا مش لازم نكون مختلفين لمجرد إننا في الساحل".
واختتمت بقولها: "راعوا الناس وراعوا الأهالي، في ناس مش لازم تشوف حاجات مش من حقها. خلينا نكون طبيعيين وبسطاء، مش لازم نعقد الأمور".
أحدث أعمال جوري بكر الدرامية
من جهة أخرى، يذكر أن آخر مشاركات جوري بكر في الدراما التلفزيونية كانت من خلال مسلسل "المداح 5"، الذي عُرض خلال موسم رمضان الماضي وحقق نجاحًا واسعًا بين الجمهور.
وفي تفاصيل دورها في مسلسل "المداح 5"، جسدت جوري بكر شخصية "شيطانة" تظهر لبطل العمل حمادة هلال في الحلقات الأولى، مما يدفع شخصيته للبحث عن حقيقة هذه الشخصية ومواجهتها طوال سياق الأحداث. وضمن القصة، يواجه "صابر"، الشخصية التي يقدمها حمادة هلال، العديد من الكيانات والشخصيات القادمة من عالم الجن والأرواح.
شارك في بطولة مسلسل "المداح" بجانب حمادة هلال نخبة من النجوم، من بينهم خالد الصاوي، وخالد سرحان، ودنيا عبد العزيز، وحنان سليمان، وهلا سمير، وعفاف رشاد، وفتحي عبد الوهاب، وسهر الصايغ، وهبة مجدي، وأحمد خالد صالح، وتامر شلتوت ، العمل الدرامي كان من تأليف أمين جمال، وقام بإخراجه أحمد سمير فرج.
