أحمد بتشان: أنا مطرب كلاسيك ومش لازم أكرر لون والدي وأغني شعبي
يعتبر المطرب أحمد بتشان من الأصوات المميزة على الساحة الغنائية، لكنه لا يظهر كثيرًا، ويفضل أن يترك أعماله تتحدث عنه، في حوار خاص مع موقع "كارافان"، فتح قلبه وتحدث عن موقفه من الدويتوهات، رؤيته لأغاني المهرجانات، وحياته الخاصة.
في البداية.. هل تفكر في تقديم دويتو قريباً؟
مش بحب أعمل دويتوهات مع أي فنان مش متحمس أو مش حابب الفكرة، لازم يكون في انسجام وكيميا عشان العمل ينجح.
البعض يضعك في خانة الغناء الشعبي بسبب والدك الفنان حمدي بتشان.. ما تعليقك؟
أنا مش فنان شعبي، ومبديش أي مساحة لأي منتج يحطني في اللون ده، مع احترامي الكبير للون الشعبي، بس مش معنى إن والدي بيغني شعبي إني لازم أقدم نفس اللون.
هل من الممكن أن تقدم أغنية شعبية مع والدك؟
أتمنى طبعًا، بس بعيد عن فكرة الأب والابن لأن الفكرة دي اتهرست كتير، ممكن نقدم أغنية شعبية بشكل مختلف يحافظ على روح التراث لكن برؤية جديدة.
ما رأيك في أغاني المهرجانات؟
بصراحة مبحبهاش، وبرفض الغناء مع مطربي المهرجانات في أي أعمال خارج الدراما أو السينما، أنا مؤمن إن لكل لون مكانه، لكن مش هو اللي يمثل الأغنية المصرية.
قدمت أغنيات في مسلسل “الأسطورة”.. هل تعتبرها شعبي؟
لا، الأغاني في “الأسطورة” بطولة الفنان محمد رمضان مش شعبية، رغم إن العمل كان بيخاطب فئة المناطق الشعبية، أنا قدمتها بروح قريبة من الدراما أكتر من كونها أغاني شعبية.
نلاحظ إنك قليل الظهور على الساحة.. ما السبب؟
أنا مقل في الظهور لأن مش بحب الانتشار المبالغ فيه، مش منطقي كل ما حد يفتح الحنفية يلاقيني، بحب أظهر وقت ما يكون عندي حاجة حقيقية أقدمها.
كيف ترى مستقبل أغاني المهرجانات؟
أغاني المهرجانات اختفت بشكل كبير في الفترة الأخيرة، وده طبيعي، لأن فنانين الأغنية الكلاسيك رجعوا وفوقوا، وأنا شايف إن ده الوضع الصحيح، لأن الأغنية المصرية طول عمرها ليها قيمة ولا يصح إلا الصحيح.
في حياتك الشخصية.. الناس فاكراك أعزب!
فعلاً كتير بيسألوني، بس الحقيقة أنا متجوز وعندي ولد وبنت، يمكن السبب إني مش بسمح لنفسي أشارك حياتي الخاصة على السوشيال ميديا، بحب أفصل بين شغلي وبيتي.
ماذا تغيب فترات طويلة بين ألبوم وآخر أو أغنية وأخرى؟
أنا مؤمن إن الغناء مش سباق، لكن قيمة، مش عايز أنزل أغاني وخلاص لمجرد إني أكون موجود، بفضل أختار وأحضر بهدوء، حتى لو ده بياخد وقت أطول، في النهاية الجمهور بيفتكر العمل الجيد مش عدد الأغاني.
