"مش حقيقي وعمرك ما كنت أعلى من جعفر العمدة".. محمد سامي يرد على عمرو سعد بعد تأكيده أنه الأعلى مشاهدة
علق المخرج محمد سامي على الجدل المثار حول لقب الأعلى أجرًا والأعلى مشاهدة خلال موسم دراما رمضان 2026، خاصة بعد ظهور النجم عمرو سعد في مقطع فيديو عبر حساباته على مواقع التواصل الاجتماعي، مؤكّدًا فيه عبر مستندات أنه صاحب أعلى مشاهدة وقيمة تسويقية، إضافة إلى تصريح سابق له باعتباره الأعلى أجرًا في الوطن العربي.
ونشر محمد سامي مقطع فيديو عبر حسابه الرسمي على فيسبوك، مصحوبًا بالعبارة: "رد واجب للتوضيح مع الاحترام لكل زمايلي وكل الصناع، ودون أدنى نية للإنقاص من مجهود أي شخص أو أي عمل، بالعكس كل زمايلي فوق راسي".
محمد سامي يعلق على مقطع فيديو عمرو سعد
وقال محمد سامي في الفيديو: "بالنسبة لفكرة رقم واحد، في فيديو لزميل بحبه وبحترمه، ظهر ماسك بعض المستندات والأوراق وبيقول أنا المسلسل رقم 1، طيب، فكرة إننا نعرف المسلسل رقم 1 محتاجة بذل مجهود، لأن الواحد لازم يفهم إزاي يقدر يقول ده رقم 1 أو 2، المحتوى لازم يلقى استحسان الجمهور في الشارع، وتفتح السوشيال ميديا تلاقيه، وأي مكان تلاقيه، بمعنى مسلسل يحقق حالة رواج بين الجمهور ويكون فيه عنه كلام، ساعتها يبقى رقم واحد".
وأضاف: "في حاجة اسمها التوثيق، على سبيل المثال، المنصات موجودة بالاشتراكات وفي البيوت، لكن فكرة معرفة من شاهد ماذا صعبة جدًا بالنسبة للتلفزيون، ممكن يحصل اجتهاد من شركات محترمة، لكن مش بدرجة دقيقة تمامًا".
وتابع: "أنا النهاردة كنجم، لما أسيب المنصة اللي أنا عليها رقم 7 أو 10، وأقول 'أنا رقم واحد على شيء مقدرش أثبته، ده غلط، لما كان جعفر العمدة رقم واحد في التلفزيون أو في الشارع، كان رقم واحد على المنصات برضه، ولما كان البرنس رقم واحد هنا، كان رقم واحد هناك، ومش بكلم عن أعمالي بس، حتى مسلسلات زمايلي أفضل مني بكثير، يعني مينفعش أمسك ورقتين وأقول أنا رقم واحد، في شيء مش باين."
واستكمل سامي قائلا: "ممكن أطلع ريتينج دلوقتي وأقولأنا رقم واحد وأنا مش موجود في رمضان، ده كلام سهل جدًا بس غير حقيقي".
عمرك ما كنت أعلى من جعفر العمدة ولا الأسطورة
وأضاف: "وبعدين، لما أقول المسلسل أعلى مشاهدة في آخر 10 سنين، الجمهور يضحك على طول، مفيش حاجة اسمها مسلسلي كان رقم واحد، عمرك ما كنت أعلى من جعفر العمدة أو الأسطورة أو البرنس وغيرهم، الجمهور صعب يضلل، وهو عاقل ويعرف يميز".
وتابع: "'جعفر العمدة' ظاهرة، ومفيش حد وصل لحالة الرواج زيه وأيضا على سبيل المثال برنامج رامز جلال، ظاهرة مفيش برنامج نجح وفضل ثابت بالحفاظ على المستوى، ومفيش بيت في رمضان مش فاتح رامز على الفطار، حتى لو اختلفت مع كل موسم".
مفيش حاجة اسمها مسلسلي أعلى مشاهدة في آخر 10 سنين
وختم سامي حديثه: "مفيش حاجة اسمها مسلسلي كان أعلى مشاهدة في آخر 10 أو 20 سنة، رقم واحد ليه دلالات بالتجاوب مع الجمهور، مثلاً، 'عين سحرية' أنا ما شفتهوش، لكن سمعت إنه نجح وحصل على تجاوب من الجمهور، واتنين غيرنا، سمعت من الناس إنهم متجاوبين مع 'هي كيميا' و'صحاب الأرض، وفي مسلسلات ما سمعتش عنها حاجة خالص، ومينفعش أطلع أقنع الناس إنه ده رقم واحد ومكسر الدنيا، ده مش صحيح".
