"محستوش ولا حبيته".. محمد دياب يكشف سبب رفضه فيلم مع توم هانكس
أوضح المخرج محمد دياب سبب رفضه العمل مع النجم العالمي توم هانكس، خلال لقائه مع الفنان عباس أبو الحسن في بودكاست “حوارات مع عباس”.
وقال دياب: "أنا كنت لسه عامل فيلم اشتباك كله في غواصة ومكان واحد، فجالي عرض من توم هانكس فيلم عن الحرب العالمية الثانية بردو في غواصة، وهو اللي مألفه وبينتجه وهو الممثل. أنا بشوف نفسي مؤلف محترف ومخرج هاوي، يعني لو طلبت مني فيلم عن كائنات فضائية هألفه عادي، بس لما قريت الفيلم ده محستوش ولا حبيته ولا حسيت بتواصل إنساني معاه. والناس دلوقتي بتقول إنه أسوأ أفلام الحرب العالمية الثانية، مع إنهم هيعملوا له جزء تاني".
وفي نفس الوقت، عبّر محمد دياب عن إعجابه الكبير بفيلم "برشامة"، واعتبره من أفضل الأعمال الكوميدية اللي ضحكته الفترة الأخيرة.
وكتب دياب على فيسبوك: "هديه العيد السنة دي هي فيلم برشامه، بينضم عندي للناظر وطير إنت والحرب العالمية الثالثة، أكتر أفلام معاصرة ضحكتني، خطير جدًا كتابة وإخراج وتمثيل وديكور وتصوير وملابس وصوت وموسيقى كل حاجة معمولة بإتقان".
وكمل: "مبروك لخالد وشيرين دياب على التأليف والإخراج، بتعملوا حاجات أنا معرفش أعملها وده بيخليني أندهش كل مرة، مبروك لهشام ماجد على دوره المختلف، ومبهور إزاي إنت دايمًا بتدي فرص لزمايلك، ومبروك لكل اللي شاركوا أدوار مميزة: مصطفى غريب، حاتم صلاح، باسم سمرة، ريهام عبد الغفور، فاتن سعيد، ميشيل ميلاد، عارفة عبد الرسول، وليد فواز".
وأضاف: "مبروك لأحمد الزغبي أخويا اللي لم تلده أمي، المؤلف الشاطر واللي قريب هيبقى مخرج ممتاز، مبروك لأحمد بدوي، وأحمد دسوقي صديق العمر والمنتج الفنان، اللي بيهتم بالدراما والمحتوى أكتر من الربح، بس المرة دي عملت فيلم هيتحقق فيه الاتنين إن شاء الله، اتفرجوا على برشامه على ضمانتي".
