مريم سعيد صالح لـ"كارافان": طلبت الشغل دون خجل.. والفن علاج للروح| حوار
استضاف موقع "كارافان" الفنانة مريم سعيد صالح في حوار خاص، تحدثت خلاله عن كواليس عودتها إلى الساحة الفنية، وأسباب طلبها العمل عبر مواقع التواصل الاجتماعي، كما كشفت عن موقف صادم تعرضت له مع أحد المخرجين، وتطرقت إلى كواليس مشاركتها في مسلسلي "الكينج" و"مناعة"، إلى جانب حديثها عن عمليات التجميل ورسالتها التي وجهتها لنفسها في ختام اللقاء.
في وقت كنتِ عنصرًا أساسيًا في أعمال كثيرة.. هل كنتِ تتوقعين العودة؟ وما الخطوط الحمراء التي تضعينها في التمثيل؟
الفن بالنسبة لي علاج للروح، وأي حد اشتغل في المجال ده هيكون فاهم إحساسه، أما بالنسبة للخطوط الحمراء، فأنا معنديش أزمة فيها، لأن من أول يوم دخلت الفن وأنا بقدم أدوار الأم والخالة والجدة، وسعيدة جدًا بالمكان اللي وصلتله.
لماذا طلبتِ العمل عبر "فيسبوك"؟
في رمضان اللي فات شاركت في مسلسلي "الكينج" و"مناعة"، لكن اشتغلت فيهم 3 أو 4 أيام فقط، وبعدها عملت عملية وصرفت عليها مبالغ كبيرة، وقعدت فترة طويلة من غير شغل، أنا معنديش فلوس في البنك أعيش منها، وشغلي هو مصدر رزقي، لذلك مفيش أي عيب إني أطلب فرصة شغل، عندي معاش زوجي، وكان لواء شرطة، لكن ده ميمنعش إني متعودة على مستوى معيشة معين، وبحاول أحافظ عليه.
هل سبق وطلبتِ العمل من أحد ورفض؟
طلبت من أحد المخرجين أشتغل معاه، لكنه رفض بطريقة صعبة، وشتمني، وبعدها عمل لي بلوك، دخلت كلمته من حساب تاني، ورديت عليه بنفس الطريقة.
ما الصورة التي تتمنين أن تصل للناس عنك؟
نفسي الناس تعرف إني مش شخصية بتحب المشاكل، لكن لما حد يغلط فيا لازم أرد، لأن أوقات الناس بتشوف جزء من الحقيقة بس.
أما بالنسبة لكواليس مسلسلات رمضان اللي فات، أول يوم تصوير في "مناعة" كان جميل جدًا، وكل الناس استقبلوني بحب، وأستاذة مها نصار قالت قدام الجميع إني فنانة شاطرة وأستحق أدوار أكبر، والكلام ده أسعدني جدًا وحسيت إنه دعم كبير، وكمان محمد إمام إنسان محترم جدًا، وبيتعامل مع كل الناس بذوق وتواضع.
هل تتابعين برنامج ياسمين عز؟
هي عارفة كويس إزاي تلفت الانتباه، حتى لو بالطريقة اللي الناس بتسميها الدعاية العكسية.
ما الذي تتمنينه في مشوارك الفني؟
نفسي أقدم أدوار أكتر وأطلع كل اللي جوايا، لأن الفن بالنسبة لي مش فلوس، ومش كل الفنانين أغنياء زي ما الناس فاكرة.
هل هناك عمل تندمين عليه؟
لا، لأن حتى الأعمال اللي مكنتش راضية عنها علمتني، وكل تجربة بتخليني أعرف أختار الأفضل بعد كده.
هل خضعتِ لعمليات تجميل؟
لا، ومش ناوية أعمل، أنا مؤمنة إن علامات الزمن على وش الإنسان بتحكي عن كل التجارب اللي عاشها، ودي بالنسبة لي حاجة أفتخر بيها.
ماذا تقولين لنفسك في نهاية الحوار؟
نفسي يا مريم تقدري نفسك أكتر، ومتديش الناس فرصة تستهين بيكي، واعرفي قيمتك، ومتقبليش أبدًا بأقل منها.
