خاص|حقيقة تقديم المهن التمثيلية بلاغا للنائب العام ضد شاب اتهم الفنانين بنشر الرذيلة
أكد الدكتور أشرف ذكي نقيب المهن التمثيلية، تقديم النقابة بلاغاً رسمياً للنائب العام ضد شاب أساء للفنانين واتهمهم بنشر الرذيلة.
وقال أشرف ذكي في تصريحات خاصة لـ كارافان:" نعم تقدمنا ببلاغ للنائب العام ضد شاب أساء للفنانين"، وتحفظ عن ذكر أي تفاصيل تخص هذا الشاب.
وكانت الفترة الماضية قد انتشرت عبر وسائل التواصل الاجتماعي عدة حملات تشير إلى الدور الذي يقوم به الوسط الفني في إفساد الذوق العام ونشر ما يضر بقيم المجتمع المصري، خاصة بعد حفل محمد رمضان الذي شهد الكثير من حالات التحرش.
ومن أبرز المنتقدين كان الشيخ أمجد سمير، الذي قال عبر حسابه على موقع التواصل الاجتماعي فيسبوك، وجاء كالتالي:
هدف أساسي لصناعة الإعلام و السينما هو (الإلهاء) و ده باعتراف واحد من أساطين الصناعة ديه!
وودي آلن Woody Allen، كان مخرج و ممثل و موسيقي و كاتب أمريكي و صاحب رقم قياسي في الفوز بالأوسكار و واحد من رواد صناعة السينما.
وودي آلن قال: مهمة مخرجي السينما هي " تشتيت" الناس ليعيشوا لحظات من المتعة بعيدا عن مواجهة الواقع.
في لقاء تلفزيوني مع نور الشريف الممثل المصري قال: بعد ١١ سبتمبر بقى غير مرحب بالسينما اللي تخاطب العقول، بقت السينما بتحرك الغرائز، فالمذيع و المحاور محمود سعد رد عليه بكلمة عميقة جدا، قاله: تسطيح العقول.
المرعب فعلا إن مهما كانت موارد صناع الإعلام و السينما فهي في الآخر موارد محدودة، تخيلوا بقى إن بعد ظهور منصات التواصل الاجتماعي(فيسبوك و تيك توك و إنستجرام و يوتيوب و غيرها) بقى المجتمع نفسه جزء من صناعة (الإلهاء) ده
كل اللي على مالكي المنصات ديه انهم يعملوا ٣ حاجات:
١) يسموا اللي بيساعدوهم مننا أسماء حلوة زي (صانع محتوى / influencer/ tiktoker / food blogger )
٢) يشجعوا الناس اللي عمرها ما فكرت تعمل حاجة زي كدة بالثراء الفاحش و السريع عشان الجيش يكبر (ماتتصدمش لما تلاقي راجل ستيني أو امرأة سبعينية موافقين يطلعوا مهزئين في فيديو مع الابن أو البنت)
٣) يلعبوا في الخوارزميات عشان الهيافة ديه تبقى محاوطاك من كل ناحية.
وفي النهاية أحب أقولك إنك انت بإيدك اللي دخلت العالم ده و انت بإيدك اللي اخترت الصفحات و الحسابات اللي تتابعها و انت بإيدك اللي اترميت في أحضان عالَم مجنون من الأراجوزات اللي كل دورهم في اللعبة إنهم يلهوك و "يسطحوا عقلك"، انت اللي عملت ده في نفسك ، و يوم القيامة قريب.
