ياسر عزت في حوار مع كارافان:ياريتنا كلنا في عباية الزعيم.. ومحمد إمام له طعمه الخاص ومافيش دور صعب عليا
خلال مشاركته في مهرجان القاهرة للسينما الفرنكوفونية، تحدث الفنان ياسر عزت عن سعادته بالتكريمات الفنية، ورؤيته لطبيعة العلاقة بين الفنان والجمهور، كما أشاد بتجربته مع الفنان محمد إمام في مسلسل "الكينج"، مؤكدًا أن عادل إمام يظل رمزا فنيا تأثر به الجميع، وكشف عن مشاركته في أكثر من عمل درامي خلال موسم رمضان المقبل.
في البداية كيف ترى أهمية التكريم بالنسبة للفنان؟ وهل يمنحه شعورًا بأنه يحقق شيئًا في مسيرته الفنية؟
طبعا، أي فنان بيتبسط إنه يتكرم، وأنا ببقى حريص إني أكون موجود، وأتمنى أكون عند حسن ظن الناس، وإني أكون "استويت" زي ما بيقولوا وبقدم الأدوار بشكل كويس، لأن في الآخر أي فنان بيشتغل علشان الجمهور.
وأكد ياسر عزت على أن الفنان يصل إلى الجمهور بفضل صدقه وإحساسه في تقديم الدور، ويجب أن يكون ذلك هو هدف كل فنان.
مضيفاً: الحقيقة إن الدور لازم يكون متصدق، فاللي قاعد بيتفرج عليه يصدقه ويلمس حاجة جواه. خد بالك، إحنا في شغلتنا دي شغلة أرواح، يعني لو الأرواح ما اتلاقتش، كممثل، مع المشاهد اللي بيتفرج عليك، تكون خسرت كتير أوي. أنت لازم تدخل قلبه قبل ما تدخل عقله، أيا كان شكل الدور اللي بتعمله.
الفنان محمد إمام كان حريصاً على الإشادة بأدائك في "الكينج" كيف تعاملت مع ذلك؟
الحقيقة إن مسلسل "الكينج" كان أول مرة أتعامل فيها مع النجم محمد إمام، وكانت مفاجأة سارة ليا إنه بعد ما اشتغلنا حس إن الشغل طلع بينا أحلى حاجة، وإنه كان طالع كويس، فقدم إشادة، وده شيء أنا اتبسطت له جدًا، لأن محمد إمام نجم كبير في مصر والوطن العربي.
بعض النقاد تحدثوا عن تمكن محمد إمام من التخلص والجرد من عباءة الزعيم.. هل لامست ذلك خلال العمل معه؟
"باشا، إحنا ياريتنا كلنا في عباية الزعيم! مفيش حاجة اسمها التنصل من عباية الزعيم".
آه، كل ممثل ليه شخصيته وليه روحه، بس في الآخر الزعيم عادل إمام في الفن المصري، وعلى مستوى العالم كله، بيتعرف بعادل إمام. كلنا اتأثرنا بنجم الوطن العربي الكبير عادل إمام في كل مراحل حياتنا.
ولو إني شايف إنها مقولة ظالمة شوية، لأن محمد إمام له طعمه الخاص، وهو بيحاول يعمل نوع من التنوع، فده شيء يُحسب له الحقيقة. لكن عباية عادل إمام إحنا كلنا تحت عباية عادل إمام.
الكوميديا أصعب من الشر.. كيف استطاعت أن تدمج بينهما في بعض الشخصيات التي قدمتها؟
مفيش حاجة صعبة لو أنت عاوز تعملها بإتقان. هي بس الفكرة إنك تكون موهوب ولا لأ، نمرة واحد. أما الميكس اللي أنت بتعمله ده، فمع المذاكرة والتدريب مش بيخليه صعب.
أنا مش شايفه صعب، أنا بستمتع جدًا وأنا بعمل الشرير اللي دمه خفيف، أو الطيب اللي عنده حتة جواه، لأن الدنيا مفيهاش أبيض وأسود، هي كلها ألوان.
في النهاية، ما هو جديدك الفني خلال الفترة المقبلة؟
والله، في موسم رمضان اللي جاي إن شاء الله، بس أنا مبحبش أتكلم قبل ما أصور، لكن إن شاء الله عندي أكتر من عمل في رمضان.
