لبنى ونس في حوار مع كارافان: بحب دور الأم.. واللي بيدايقني إني محصورة في أدوار النكد والزن
خلال لقائها في مهرجان القاهرة للسينما الفرنكوفونية، تحدثت الفنانة لبنى ونس عن سعادتها بلقاء وتكريم الفنانة نادية الجندي، مشيدة بمشوارها الفني وما قدمته من أعمال، كما كشفت عن أحدث أعمالها الفنية، ومنها مسلسل "ولاد الأذينة" وفيلم "فرصة سعيدة"، الذي تشارك في بطولته إلى جانب أحمد مكي وماجد الكدواني.
وتطرقت لبنى ونس إلى تجربتها في تقديم ورش التمثيل، موضحة كيفية تنظيم وقتها بين التدريب والعمل الفني، كما تحدثت عن حبها لتقديم أدوار الأم، مؤكدة أن ما يزعجها هو حصرها في أدوار النكد والزن، ورغبتها في خوض تجربة الكوميديا.
في البداية.. ماذا تقولين عن الفنانة نادية الجندي وتوجهين لها تحية؟
أنا سعيدة إني هشوفها وهلتقي بيها لأنها تعبت في مشوارها الفني وقدمت كتير وتستحق التكريم، وأبسط حاجة نقدملها إن إحنا نكرمها.
قدمت مسلسلات وأفلام كتير.. تحبي تشوفيها فين؟
بحب فيلم "مهمة في تل أبيب".
بتقدمي ورشة تمثيل.. هل بتحتاج جهد وممكن تاخدك من الفن؟
أنت عندك وقت ربنا مدهولك بتوزعه، وبناءً على الأهمية أنت بتتحرك، ومعايا مجموعة شباب موهوبين وشاطرين، ولو عندك واحد موهوب وواحد مش موهوب، لو الموهوب مش بيتعب على نفسه موهبته هتبقى فاضية، ولو الغير موهوب تعب على نفسه وشغوف هتلاقيه.
إيه الجديد اللي بنحضر ليه دلوقتي؟
لسه مصورة مع الأستاذ أحمد سمير فرج "ولاد الأذينة" ضيفة شرف، وفي فيلم تاني "فرصة سعيدة" إخراج الأستاذ أحمد الجندي، كوميدية اجتماعية بطولة أحمد مكي وماجد الكدواني، وطالعة بدور أم أحمد مكي في الفيلم.
بتضايقي إنك محصورة في دور الأم؟
بحب دور الأم جدًا، معنديش مانع، اللي بيدايقني إني محصورة في دور النكد والزن، وعايزهم يجربوني في الكوميدي.
هتكوني موجودة في دراما رمضان السنة دي؟
يعني لو في نصيب، أنا كنت في "المداح" السنة اللي فاتت وإن شاء الله أبقى موجودة.
