مي كساب: ندمانة على اختيارات في لبسي.. وزعلانة من أحمد الفيشاوي
كشفت الفنانة مي كساب خلال لقائها في برنامج "Mirror" عن عدد من التفاصيل الشخصية والفنية في حياتها، وتحدثت بصراحة عن علاقتها بوالديها، واختياراتها للأشخاص المحيطين بها، وبعض قراراتها التي ندمت عليها، إلى جانب موقفها من الحجاب، وذكرياتها مع مسلسل "تامر وشوقية"، كما روت تفاصيل مؤثرة عن وفاة والدتها.
مي كساب: “أنا رأيي من دماغي”
وتحدثت مي كساب عن طريقة اتخاذها للقرارات، مؤكدة أنها لا تعتمد عادةً على آراء الآخرين، باستثناء والديها، قائلة: "أنا مش الشخصيات اللي بتاخد اراء ناس في الحياة دائما رأيي من دماغي الا بابايا ومامتي هما الوحيدين اللي كان ليهم رأي كبير اوي معايا والاب والام بيبقي ليهم نظرة في اللي حوالين ولادهم".
كما اعترفت مي بأنها أخطأت في اختيار بعض الأشخاص المحيطين بها، موضحة أن طيبتها وحسن نيتها كانا سببًا في ذلك، وقالت: "أنا في اختياراتي في البني ادمين اللي حواليا كنت دائما بغلط انا طيبة زيادة عن اللزوم وبفترض دائما حسن النية في الأشخاص اللي قدامي وبفترض اني مؤثرة وهعرف اغير واني في المدينة الفاضلة وده غلط تماما لأن اللي مترباش في بيت ابوه وامه الدنيا مش بتربيه".
مي كساب: “أنا مؤمنة باختياراتي”
وعن بدايتها وثقتها في نفسها منذ الصغر، قالت: "انا مؤمنة باختياراتي وشايفة نتائجها من وانا طفلة شايفة نفسي مميزة وعارفة اني هبقي مشهورة وكنت يقف قدام المرايا واقدم نفسي وبابا رباني اني هتبقي حاجة وكان بيحب الفن لانه كان كاتب وناقد ادبي".
وتطرقت مي إلى موقف تعرضت له بسبب الغناء، قائلة: "في زميلة لماما قالتلي صوت المرأة عورة والغنا حرام وانا قولتلها الرسول عليه افضل الصلاة والسلام مقالش كده".
كما تحدثت عن بعض الاختيارات التي اتخذتها في فترات سابقة من حياتها، مؤكدة ندمها على بعضها، وقالت: "جه عليا وقت غلط في حاجات معينة اكيد ندمانة عليها دلوقتي وفي سنة من عمري لبست بحرية ندمانة عليها ومش عارفة ليه عملت كده ده ضد مبادئي وتربيتي وفي فستان لبسته في فرح فنانة بردو ندمانة عليه".
مي كساب: "لو قررت الحجاب هحتجب"
وفيما يخص الحجاب، أكدت مي أن لكل شخص حريته في اتخاذ قراراته، موضحة: "كل واحد حر يعمل اللي هو عايزه اللي شايف أن هو يتحجب ويمثل براحته لكن أنا لو قررت الحجاب هحتجب وهاروح للحياة اللي انا عايزة اعيشها للزهد في الدنيا".
وتحدثت مي كساب عن وفاة والدتها، وروت موقفًا مؤثرًا حدث معها عقب الوفاة، قائلة: "والدتي لما توفت معرفش جبت القوة ديه منين ولقيت نفسي بطبطب على اخويا وبتعامل بهدوء ونزلت معاها التلاجة لحد ما خرجت لقيت ست بتعيط على ماما ومنهارة عشان ماما توفت وهي متعرفهاش وقالتلي مامتك طول الليل مبتندهش غير عليكي وتقول يا مي ربنا يسترك فطبعا حسيت بحاجة كبيرة اوي".
كما كشفت عن تفاصيل اللحظات الأخيرة لوالدتها، قائلة: "في اللحظة اللي والدتي اتوفت فيها مكنتش قادرة اغسل معاهم بس كنت واقفة وكانت مبتسمة علامات حسن الخاتمة وهي كانت ست كويسة ومكان الكانيولا اختفى".
وعلى الجانب الفني، أعربت مي كساب عن حزنها من عدم استكمال مسلسل "تامر وشوقية"، مؤكدة أن العمل كان يمثل لها حالة خاصة، وقالت: "انا زعلانة من احمد الفيشاوي ازاي تفرط في تامر وشوقية لأنه كان بالنسبة لى حاجة يستمتع بيها فمكنتش اتمني أنه يبنتهي وكان نفسي نكمل لحد ما نبقي اجداد وهو اللي اخد قرار أننا منكملش".
