"كرب ورزق واقف".. أسما شريف منير تتحدث عن مرورها بمرحلة صعبة
تحدثت أسما شريف منير عن تجربة شخصية مرت بها خلال الفترة الأخيرة، أوضحت خلالها أنها واجهت ضغوط نفسية وروحية قوية، تسببت في حالة من الاضطراب والشك، وجعلتها تعيد التفكير في كثير من الأمور المرتبطة بحياتها وإيمانها.
وأوضحت أسما شريف منير، عبر منشور مطول نشرته على حسابها الرسمي بموقع "إنستجرام"، تفاصيل تلك المرحلة، قائلة: "الفترة اللي فاتت كانت صعبة، كان فيها كرب، رزق واقف، وشكوك بتتسلل لعقلي الشيطان حاول يقنعنى إن التزامي هو سبب المشاكل.. حسّيت بضغط من كل ناحية، حتى من أقرب الناس ليا خذلوني".
وأضافت أسما شريف منير، أنها مرت بلحظات شك قبل أن تعيد ترتيب أفكارها، كاتبه: "بدأت أشك فى إيماني، لكن لما رجعت لربنا، فهمت إن الابتلاء هو جزء من طريق المؤمن، الأنبياء نفسهم اتعرّضوا لاختبارات، وده كان دليل على قربهم من ربنا.. ربنا صفّى لى رؤيتى بشكل أنا نفسي مكنتش متخيلة إنى محتاجاه.. بقيت أشوف الناس على حقيقتها".
وتناولت أسما شريف منير تغير نظرتها للأشخاص المحيطين بها بعد هذه التجربة، كاتبه: "مش على اللي كنت بتمنى يبقوا عليه، ولا على الكلام الحلو اللى بيتقال، ولا على النسخة اللى كنت ببررها في دماغي عشان ما أخسرش حد.. بدأت أفهم مين بيحبنى بصدق.. ومين كان موجود بس عشان أنا مفيدة.. مين بيظهر وقت الجد حتى لو ده هيكلفه... ومين بيختفى أول ما الموضوع يحتاج منه مجهود، أو التزام، أو مجرد احترام".
كما أشارت أسما شريف منير إلى إدراكها لعدد من الدلالات الإيجابية خلال تلك الفترة، مضيفة: "عرفت إن اللي بيبان إن الدنيا ماشية معاهم كويس مش دايمًا على حق.. وبدأت أشوف علامات إن الناس اللى حواليّة بيدعولى، وإن ربنا بيطبطب عليّ.. إن مع العسر يسر، حتى لو الوجع لسه موجود".
واختتمت حديثها برسالة عامة، قالت فيها: "أنا دلوقتي فاهمة إننا أحيانًا بننسى إن الدنيا مش الهدف الحقيقى.. المهم هو الآخرة، هو اختبار صبرنا.. اللى عايزه أقوله.. لو بتعدّوا بوقت صعب، اعرفوا إن ربنا لسه عايزكم.. لو الدنيا وردى طول الوقت، اقلقوا المهم، رجوعنا لربنا، صبرنا، وتسليمنا.. الحمد لله دائمًا وأبدًا.. إذا شفتوا كلامى، ادعولي".
