مواقف مُلهمة كشف عنها كريم الحسيني في ذكرى رحيل نور الشريف
في ذكرى رحيل قامة فنية وإنسانية عظيمة، شارك الفنان كريم الحسيني جمهوره ومتابعيه ذكريات مؤثرة جمعته بالنجم القدير الراحل نور الشريف، تُبرز هذه المواقف جوانب استثنائية من حياة الأستاذ الراحل، الذي لم يكتفِ بكونه فناناً قديرًا أمام الكاميرا، بل كان مثالاً يُحتذى به في التواضع، ودعم الوجوه الشابة، والاحترام العظيم لجمهوره وفنه.
ذكري رحيل نور الشريف
وكتب: "بمناسبة ذكرى رحيل الفنان المحترم الاستاذ نور الشريف رحمة الله عليه .. فى مره كنت بعمل قدامه مشهد مهم جدا وكنا شغالين بكاميرا واحده سليما ، المهم خدنا زاوية الأستاذ نور الأول (الكاميرا عليه) .. وطبعا أنا وقفت زى الأسد فى زاوية الأستاذ ومثلت وطلعت أفضل ماعندي كأنها زاويتي أنا .. وبعدين لما جيت أعمل زويتى ماكنش فيه مكان يوقف فيه الأستاذ عشان المكان كان ضيق جدا .. ياما عامل الاضاءه يوقف عشان ينور وشى إما هو يوقف مكانه .. قوم يعمل إيه بقى الأستاذ الكبير...؟؟؟ يقوم الفنان المحترم يمسك من عامل الإضاءه (البولى) اللى هو الفله البيضا اللى بينور بيها وش الممثل ويوقف مكانه عشان أفضل فى نفس المود اللى كنت عليه ومفصلش طبعا أنا كنت ف المود ومش مركز غير في إنفعال المشهد .. بس لما خلص المشهد وبصيت لاقيت نجم كبير بحجم الأستاذ ماسك لى (البولى) عشان ينورلى وشى ولما سألته ليه عملت كده قام حضنى وباسنى فى راسى وقالى ياض أنا بحب الممثلين الشاطرين .. وبعدين ماينفعش أنت تقفلى فى زوايتى وتبذل أقصي جهدك وأنا أسيبك تمثل مع الحيطه .. وادخل الكرفان شوف الحب والتواضع ياخى".
وأضاف: "طب أقولكم على حاجه كمان .. كنا بنصور في فندق شهير في إسكندريه .. ولاقيته قاعد في اللوبي الصبح عشان بينضفوا الغرفه بتاعته .. قاعد وحاطط الورق بتاعه وبيذاكر ولا طالب في معهد فنون مسرحيه .. طبعاً لاقيته قاعد جريت عليه وإستأذنته ممكن أقعد معاك ولا هازعجك .. قعدني وقالي بُص المسوده اللي بعملها للشخصيه .. طب بُص التفصيله دي .. وخدت منه أحلى محاضرة تمثيل مجانيه وهو كان حابب يفيدني .. كانت رجله وجعاه الفتره دى جدا وماكنش بيقدر يوقف عليها كتير .. وكل شويه طبعا حد يكون معدي يلاقي الأستاذ نور الشريف قاعد يطلب يتصور .. الأقي النجم القدير المحترم يقوم ويداري وجعه وتعبه ويوقف على رجله عشان يتصور معاه .. قولترله حضرتك تعبان ممكن تتصور وانت قاعد عادي .. ضحك وقالي .. انت عارف اللي جايلي ده جايلي منين ورايح فين بعد كده !!؟ المقابله البسيطه انى ااقف واديله من وقتي واتصور معاه واضحك في وشه دى هى رصيدى الحقيقي اللي هايفضل بعد ما امشي .. هايفضل فاكر الخمس دقايق دول ويقول ده قابلني مقابله جميله".
وأختتم: "الكلام على أستاذ نور مش هايخلص .. والمواقف كتيييير .. وكلها دروس .. الحمد لله إنى إتربيت على إيد فنانين محترمين زى الأستاذ نور الشريف الفاتحه على روح المحترم العبقرى الفنان نور الشريف مش عارف ليه بفتقدك جدا الفتره دى وبتفرج على كل لقاءاتك اللى أنا حافظها وكأني بشوفها لأول مره ربنا يرحمك ويغفر لك يارب".
