أحمد شاهين يكشف كواليس "بنج كلي".. من سر انجذابه لعصفور إلى أصعب مشاهد العمل| خاص
تحدث الفنان أحمد شاهين في تصريحات خاصة لـ"كارافان" عن تجربته في مسلسل "بنج كلي"، الذي قدم خلاله شخصية دكتور عصفور، كاشفًا تفاصيل اختياره للدور، وتعاونه مع المخرجة نادين خان، إلى جانب كواليس الشخصية وردود فعل الجمهور عليها، مؤكدًا أن العمل مثّل بالنسبة له فرصة للخروج من منطقة الكوميديا وتقديم شخصية مختلفة عما اعتاد عليه الجمهور.
أحمد شاهين: “الورق مختلف”
وعن سبب حماسه للشخصية، قال: "الورق أنه مختلف وشخصية مختلفة عليا وجديدة معملتهاش قبل كده فيها تحول كده بيحصل"، وأضاف: "وطبعا لما عرفت أن المخرجة أستاذة نادين خان فمترددتش لحظة وطبعا هي اللي رشحتني وهي أستاذة ومخرجة كبيرة ويشرفني يكون في الـCV بتاعي مسلسل من إخراجها وبقالي فترة نفسي أشتغل معاها فلما اتاحت الفرصة وعرفت أن المسلسل بطولة سلمي ابو ضيف ودياب فقولت يلا على طول".
وتطرق أحمد شاهين إلى نهاية عصفور ومشهد الوفاة، موضحًا أنه كان يشعر بالقلق تجاه هذا المشهد منذ اللحظة الأولى التي قرأ فيها السيناريو، خاصة أنه كان يحمل رسالة مهمة أراد إيصالها بالتعاون مع المخرجة نادين خان، قائلًا: "نهاية عصفور المشهد بتاع الموت أنا شايل همه من أول يوم من أول ما قريت الورق، وأنا ونادين خان كنا عايزين نوصل حاجة معينة والحمدلله الرسالة دي وصلت وعملناه على أكمل وجه".
مفارقات غريبة
وعن ردود فعل الجمهور تجاه الشخصية، قال: "الناس في مفارقات غريبة، على قد ما كرهت شخصية عصفور بس في كومنتات بردو من الناس حبتني، ففي مفارقات غريبة، والشخصية كانت مؤثرة وده ملموس سواء على السوشيال ميديا أو في الشارع، وده بسطني جدا"، كما كشف عن تعليق لفت انتباهه، موضحًا: "في بوست حد كتبه بعنوان: "الشرير الذي أحببته"، وده ضحكني جدًا، لأن في ناس كرهتني لكن في نفس الوقت كانت عايزاني أفضل موجود ومكمل، وزعلوا لما عصفور مات".
وأضاف: "ولما عرفوا إنه بيسرق مخدرات كرهوه جدًا، رغم إنهم كانوا حابينه في الأول، فانقسم الجمهور بين ناس بتحبه وناس بتكرهه، وعموما أنا مبسوط جدًا بالجدل ده، لأنه معناه إن الشخصية أثرت في الناس".
وكشف شاهين أن مشهد الوفاة كان من أصعب المشاهد التي قدمها خلال المسلسل، قائلًا: "أصعب وأكتر مشهد أثر فيا كان مشهد الوفاة الأخير، لأننا كنا عايزين نقول منه حاجات كتير، وأستاذة نادين طبعًا مخرجة كبيرة وبتحب التفاصيل، وقعدنا نشتغل كتير على الدور، وصورنا المشهد في 3 ساعات، تفاصيل مشهد الوفاة كانت صعبة جدًا، والناس صدقت المشهد وطلع حقيقي جدًا".
وأشار إلى أن “بنج كلي” جاء في توقيت مناسب لرغبته في الابتعاد عن الأدوار الكوميدية، موضحًا: "كان بقالي فترة بعمل كوميدي، فكنت مستني ورق ييجي زي بنج كلي عشان أقدر أعمل حاجة مختلفة، لما جه ورق يخليني أنقل النقلة دي ويخلي الجمهور يشوفني في حاجة مختلفة غير الكوميدي، حسيت إن الدنيا لطيفة والناس متقبلة، فأنا لو في ورق تاني من الجد وبيناقش قضية، طبعًا أحب أعمله جدًا".
أحمد شاهين: “مش باصص للبطولة المطلقة”
وعن البطولة المطلقة، أكد أحمد شاهين أن تركيزه في الوقت الحالي ينصب على قيمة الدور وتأثيره، وليس مساحته، قائلًا: "مش باصص خالص لموضوع البطولة المطلقة، وشايف إن كل حاجة بتيجي في وقتها، المهم والفكرة إني أعمل دور مؤثر، دور عصفور على قد ما مساحته مش أكبر حاجة، لكنه مؤثر جدًا، الحمدلله أنا موجود حوالي 5 حلقات في المسلسل، ومبسوط جدًا بالشخصية وبردود الأفعال، والشخصية كانت مؤثرة والناس تعاطفت معاها وعاشت معاها وصدقتها".
أحمد شاهين يكشف كواليس مسلسل “بنج كلي”
وتحدث شاهين عن أجواء الكواليس، مؤكدًا أن الانسجام بين فريق العمل انعكس على التصوير، وقال: "كواليس المسلسل حلوة أوي، سلمى أبو ضيف ودياب وعمرو حلمي وناندا محمد وأستاذ محسن محي الدين وكل الممثلين لطاف جدًا، والكيمياء كانت حلوة أوي، وبما إن لوكيشن المسلسل كان اللوكيشن الأساسي، فكنا يوميًا مع بعض، فالكواليس كانت كلها هزار وضحك، وبمجرد ما نبدأ تصوير بنفصل كلنا ونركز في الشغل".
وأضاف: "من أكتر المواقف الطريفة اللي كانت بتحصل في المستشفى وإحنا بنصور مثلا ومندمجين نلاقي قطة معدية فده بيفصلنا وبنضحك وفي مواقف كتير لطيفة".
كما تطرق إلى تأثير السوشيال ميديا على نجاح الفنان والعمل، قائلًا: "السوشيال ميديا بقت مهمة جدًا، وكل حاجة ليها إيجابيات وليها سلبيات، كل الناس دلوقتي ماسكة التليفونات في إيديها، يعني ممكن حد يكون مش بيتفرج على التلفزيون، ولكن بيفتح الأبليكيشن على الموبايل يتفرج على المسلسل، ويقول رأيه ويكتب كومنت ويعلق".
وتابع: "وبحب أشوف تعليقات الناس كلها وأحب اشوف الكلام اللي بيتقال ولو في حاجة مش صح ممكن أرد عليها وأوضحها ولو في حاجة صح والناس كاتبة كلام كويس احب أرد وأشكرهم لأن الناس ديه هي بتخلينا موجودين فالتفاعل على السوشيال ميديا مع الجمهور مهم جدا".
وأكد أحمد شاهين حرصه على تقديم أدوار مختلفة وعدم الوقوف عند منطقة فنية واحدة، قائلًا: "أنا دائمًا بقول إني اشتغلت مع مخرجين كبار وأنا لسه صغير، وعايز أشتغل مع كل المخرجين والفنانين، عمومًا أنا بحب أعمل حاجة جديدة ومبحبش أكرر نفسي، وفي نجوم كتير أوي نفسي أشتغل معاهم، فإن شاء الله الفترة الجاية ربنا يوفق ويتيح الفرصة إني أشتغل مع مخرجين ونجوم جداد".
وعن أكثر ما اكتشفه في نفسه من خلال شخصية عصفور، أوضح: "أنا كنت قلقان من إني أعمل جد ودكتور عصفور ده دكتور تخدير وفي الآخر بيطلع مدمن، فالتركيبة نفسها صعبة وتقلق أي ممثل، خصوصًا لو جاي من خلفية إن الناس بتحبه وإنه بيطلع يهزر ويضحك، فطبعًا التحول ده مكنش سهل، ولكن اكتشفت إن الحمدلله نقدر نعمل حاجات كتير".
وفي سياق حديثه عن مهنة الطب، حرص شاهين على التأكيد أن شخصية عصفور لا تمثل الأطباء بشكل عام، قائلًا: "مهنة الطب مهنة مهمة جدًا، وكل مهنة فيها الحلو والوحش، أنا قابلت دكاترة تخدير محترمة جدًا وناس بتحب شغلها جدًا وناس بتحافظ جدًا على المرضى، فدكتور عصفور حتى لو هو شخصية حقيقية فهو قلة قليلة من اللي موجود، لكن طبعًا الطب مهنة عظيمة ومهمة، وفي وقت من الأوقات في حقبة زمنية كان دورهم مهم جدًا في البلد".
